روشته فى الحب

موضوع النهارده بسيط عبارة عن روشتة بسيطة فى الحب عن الحاجات اللى نعملها واللى نبعد عنه عشان نصون اللى بنحبهم ونحتفظ بيهم جنبنا

اول حاجة مهمة اننا نحسسهم باهميتهم عندنا واننا محتاجنهم جنبنا وان بيهم حياتنا هتكمل واننا هنضيع من غيرهم ونعرفهم قد ايه لو وفقوا جنبنا هنبقى احسن حاجات بسيطة بس بتفرق كتير ومحدش بيخلى باله منها وده اللى بيخلى الحبايب فى وقت من الاوقات مش حاسين اللى بيحبوهم بعدين لانهم بيحسوا انهم عالهامش لانهم عمرهم ما عرفوا قدرهم عند اللى بيحبوهم

وكمان ميحصلش حاجة لو قلنالهم كلمة حلوة او او حتى حوشت من مصروفك يا عم تامر وجبت لشرين هدية او حتى دخلت عليها بوردة بدل حزمة الجرجير ولا البصلة تنفيذا للمثل اللى بيقول (بصلة المحب خروف)الكلام ده كان زمان دلوقتى فى اختراعات كتير قوى وكمان بلاش الهدايا اللى تخض ولا تجيب صدمة عصبية وكمان بلاش الحاجات اللى بتنط فى الوش ولا اللى تفرقع وتعمل زى الصعيدى اللى جه يهزر مع مراته ضربها بالشومة وقالها بخ

وميحصلش حاجة يعنى لو اول ما صحيت من النوم ترن على حبيبك او تبعتله مسج تحسسه فيها بالحب والامان وان الدنيا جميلة وبطلوا بخل بقا دى الرسالة بقت ب 30 قرش يعنى مش قصة وتتردلك فى الرصيد ان شاء الله

وكمان بلاش يا فتحى تروح تقول لفتحية بحبك ولا وحشتينى وانت مادد بوزك شبرين خلى فى ابتسامة حلوة كدا عالاقل الواحد حتى لما يحلم ولا قبل ما ينام يفتكر ملاك مش .....ولا داعى لذكره. يعنى حتى لو مهموم قابل حبيبك بضحكة صدقنى دى كفاية قوى انها تسعده وتغير من حاله وكمان هيفتكرلك حاجة حلوة وابسط يا عم

خليك قريب من حبيبك والحب الحقيقى انك تحس بيه حتى لو بينكم بلاد, لو زعلان او متضايق وحاول تخفف عنه وتفرحه وبلاش تمسكله عالواحدة امسكله عالتانية.هههههههه. وقدر الظروف شوية وعدى وفوت ولو زعلك اسكت خالص وهو هيعرف انه غلط او مقصر فى حقك وهيجى يعتذرلك ومش بعيد يكون فيها كلمتين من اللى قلبك بيحبهم ولا هدية مع اننا فى زمن منيل بس يالا اهوه بننصح على الله يجى بفايدة

واللى اعرفه ان شركة فودافون قالت اتكلم من القلب وكمان الكلام بقا ببلاش والصلاحية مدى الحياة هههههههههههههه يعنى كل اللى مطلوب نقول الكلام واحنا حاسينه مش ندبه كاننا بنقول كارثة ولا كانه حمل على كتافنا نقول الكلام بكل احساس وكمان ياريت لو حبيبك قالك بحبك او وحشتنى نرد عليه بالمثل مش نقوله وانت كمان ايه ده بس الكلام ببلاش والله ومش هيجرى حاجة لو قلتله وانا كمان بحبك او وانت كمان وحشتنى الحاجات دى بتقرب قوى الحبايب


ومش معنى اننا نقول كلام حب اننا نزهق اللى بنحبه ولا نيجى نكلمه نتخن صوتنا ونوحشه علشان يحرم يطلب انه يسمع كلمة بحبك مثلا لا بقا بالعند هيطلب هههههههه. الفايدة من الكلام ده حاجات كتير قوى منها اننا بنزود الحب ده ولو حصلت بينا مشاكل الكلام ده هو اللى بيغفر الاخطاء للحبيب زى ما الست انغام قالت ده من غيره الحياة باردة وبيه يبقى قليله كتير حاجات ممكن تغيب عنك بسيطة وسهلة معناها لكن بزعل قوى منك وانا شايفاك بتنساها بحبك وحشتينى انا اسف على التاخير بس متزودهاش بقا تسيبها منتظرة كل ميعاد ولا تطنشها وتقولها فى الاخراسف لان المثل بيقول الشىء لما يزيد عن حده ينقلب ضده

وخلو بالكم من حبايبكم وحاولوا تكونوا قريبين منهم لأن الزمن ده مش سهل فيه انك تلاقى حد بيحب بجد او يستاهل منك انك تصونه وتفديه بعمرك والله فى ناس كتير بس الحظ والنصيب بيوقعنا مع ناس بيكرهونا فى الحب وسنينه بس صدقونى سيبوا نفسكم للدنيا وهتلاقوا الحب الحقيقى بيدخل قلبك من غير حتى استئذان........ وكان فى موضوع قديم هنا عالمنتدى للأخ العزيز محمد شيفشنكو بيقول فيه ايه هيا مواصفات الحب الحقيقى وكان فى نقطة بتقول ان الحب الحقيقى بيجى من ناس احنا مش متوقعنهم خالص اننا ممكن نرتبط بيهم وبنكون باصلنهم على انهم اصدقاء او اخوات برغم انهم قريبين مننا وياريت لو حد فينا كان يأس من الحب بلاش نظهر كدا قدام القريبين منا يمكن يكون فى حد فيهم يستاهل اننا نسلم قلبنا له وبلاش نتعسهم ونديلهم فرصة انهم يقربوا مننا وصدقونا ساعتها مش هيكون فى جرح

كلامى النهارده خلص بس لسه فى كمالة مع روشتة الحب رقم 2 بان الله ويارب يكون موضوعى خفيف عليكم واكون وفقت فيه


هنكمل بقا الروشتة التانية مع ان باين ان الاولى مش عجبت حد المهم انا هقول رائى مهما كان يعنى وهى مش رخامة بس اهو نوع من التعبير يعنى وكدا بس ارجوكم محدش يفتكر انى دكتورة زى الاخ ابراهيم بس فى واحد زميلنا قال اذا لمس الحب القلوب اصبح كل انسان شاعرولما كمان الفرح يلمس الروح يقدر اى انسان يكتب عن الحب

التفاهم هو اساس اى علاقة ناجحة وزى ما بيقولوا اقرا حبيبك وانت تقدر تفهمه وتقرب ليه

التسامح تانى حاجة علشان تقدر تحافظ على حبك لاى حد

على فكرة فى مصطلح بقولوا عليه اسمه التقل وفى مثل بيقول اتقل على الرز يستوى احنا لا بنقول حبيبك هو الرز ولا حاجة بس افهموها انتوا بقا وعلى فكرة معظم اللى بيتقلوا على حبايبهم بتكون نهايتهم ما يعلم بيها الا ربنا فبلاش التقل يا جماعة

الصراحة اجمل ما فى الحياة وخصوصا الحب واذا بنيت علاقة الحب عليها اضمنلك مليون فى المائة ان حبك يدوم العمر كله وده طبعا بامر الله

الصدق خليكصادق مهما كانت الحقيقة تجرح احسن ما تكدب وتخلى الجرح جرحين وابعدوا عن الكدب ابيض ولا اسود وبلاش الهزار فى المواضيع الحساسة اللى ممكن تقلب بنكد

فى حاجة حلوة قوى سمعت عنها اسمها بزازة النكد ودى بتكون مصاحبة لاى اتنين بيحبوا بعض وخصوصا المخطوبين تلاقيهم قاعدين بيضحكوا وفجأة تلاقى الدبل بتطير ومش بعيد تنتهى القصة بجريمة اقصد فراق

المصارحة بالحب والمشاعر والاحاسيس اكتر حاجة مهمة على الاقل لو فى حاجة او خصام لا قدر الله هو ده اللى بيرجعهم لبعض... الكلمة الحلوة الطيبة بتخلى الواحد مش قادر يبعد عن حبيبه


مفيش حاجة اسمها الكرامة الجامدة قوى فى الحب لازم كل طرف يتنازل عن شوية حاجات علشان المركب تمشى

متهيئلى يا جماعة معنديش كلام تانى اقوله وربنا يهنى كل اتنين وحافظوا يا جماعة على الحب لان الايام دى صعب نلاقى الحب الحقيقى

شكرااااااااااا يا شهد وجدت الحل بس هستنى برده الروشته التانيه

جديابيشوى قدرت اساعدك ولالسه